【開心分享】Vienna Hacademy 同事嘅優點
今日有少少分享, 今個月VH就開左4年啦！
想多謝一路支持我哋嘅家長之餘，都想多謝一班陪伴我一齊行嘅同事。
喺呢幾年我都見過好多唔同嘅人申請想加入VH！好開心知道有好多人有興趣教育呢一行。
做教育係一種付出，要有愛心、耐心、信心、同理心、仲要用心。
做教育同時亦都係一種收穫, 其他行業可能未必有咁大嘅滿足感。
我一對手始終幫唔到好多小朋友，而香港對於有特殊教育需要小朋友嘅支援又唔太足夠。
所以我哋一直都希望搵到真正有心嘅人，繼續用生命影響生命，好似電影非同凡響、黃金花同五個小孩的校長一樣。
其實音樂同ABA教學技巧我哋可以教，但係心態、耐性、堅毅，呢啲如果做特殊教育需要嘅老師特質，就唔係咁容易教到出嚟。
好多小朋友可能喺其他地方學唔到嘅，嚟到呢度就學到，係因為呢度最多有心嘅人，關係建立得好，學習一定事半功倍。
VH嘅同事個個都係由細就開始學音樂，深深明白到音樂對腦部嘅發展、整體既協調同埋情緒既控制都好有幫助。
如果你都想跟我哋嘅導師學習，就聯絡我哋啦！
我會將音樂對腦部發展嘅影片放下面俾大家參考。
Commenti